Heam disamnim Kala Akademi vosreant, vorsavollicho Spordha “amateurs” tiatrist kolakarancho cholot asa. Zaitea ganv-ganvche pongodd tiatrant bhag ghetat, ap-apli huxarki dakhoitat, inam’ zoddunk sodtat. Lok tor khub, vosrobhor hajir asta, ani nimannea vellar pavxi tor, tiket mellunk kottin zata. Tikettichem mol fokot 20/- rupia. Hea spordheacho hetu - tiatracho dorzo voir kaddop, nove-nove kolakar ani kantorist amcheam tornnateam modle utpon’n korunk ani pollevpeank moujer haddop. Khorem: Nemlelea vellar tiatr suru zaunkuch zai ani fokot oddech tim tin horam modem sompounk zai. Heam mhoineachea 10ver, 2007 (Octobr) ho tiatracho umedicho spordha sompta.
Adlim Kantaram Novean Jivim
Konknni kantaram mogeank ek umed haddpi khobor: Kaim “amateurs” kolakar adleam tiatrist bhavanchim kantaram portun machier gavpak fuddem sorleat. Kaim dis fattim, Joao/Tomazinho Cardozo ani tanchea pongddan, Odruxtti Jivit hea aplea pon’nas vorsam poilim boroilelea tiatracho ek dakhovn zali tednam Kala Akademi vosreant zaiteam adleam tiatristanchim kantaram gavun lokanchi khub xabaski zoddli. Khorench “Old is Gold” hem amchem mhonn’nem disun ailelem. Hench monant dovrun thoddech amche tiatrist fuddem sorleat ani ek dakhovn korunk adleam kantarank novem jivit divnk tannim yevjilam. Aikunk melltole tanchea talleant zaite amche adle tiatrist: Dod de Verna, C. Alvares, Alfred Rose, Alexinho de Candolim, Anthony Mendes, Minguel Rod, Young Menezes, Kamat de Assolna adi. Otubrache 20ver, 2007 ho dobazo zatolo Kala Akademi “Open Air” vosreant, sanjechea 7.15 horar zatolo. Tikettinchem mol 50/- rupia ani teo Kala Akademint Otubrache 10ver thaun vikrek mellteleo.
View www.goa-world.com/goa/tiatr/
